بالصور .. سما المصرى : اخترت اسم "فلول" للقناة بدل "30 يونيه" عشان محدش يقول الثورة بتعبر عن الرقاصين

على كلمات أغنية "بانوا" للفنانة الراحلة سعاد حسنى، تعرض قناة فلول، عددا من اللقطات لأعضاء جماعة الإخوان المسلمين بصورة ساخرة، انطلقت قناة "فلول" قبل أيام من ذكرى اندلاع ثورة 25 يناير، رداً على قناة الإخوان التى انطلقت منذ شهر تقريبا والتى تحمل اسم "رابعة".

 

من جانبها، قالت الفنانة الاستعراضية سما المصرى وهى صاحبة القناة، إن وجودها الآن هو دور وطنى يجب أن تقوم به. 

 

وأضافت الفنانة الاستعراضية سما المصرى: "قررت أعمل القناة دى بعد الإخوان ما عملوا قناة رابعة، الحقيقة هما استفزونى إزاى يعملوا قناة ويحرقوا دم المصريين لازم إحنا كمان نعمل قناة ونحرق دمهم عشان كده اخترت اسم "فلول" وهقدم على القناة أغانى بتسخر من الإخوان وتحرق دمهم، مؤكدة: "مش هحرق دم الإخوان بس لا وكمان هدفى أكشف كل العملاء والنشطاء السياسيين اللى اتأكدنا إنهم ضد البلد وباعوها مقابل فلوس". 

 

وعن هدف اختيار اسم "فلول" تحديدا، وهل إذا كانت تقصد به فلول الحزب الوطنى، أكدت سما "لا أنا مقصدتش خالص أتكلم عليهم دول بالنسبة للإخوان ملايكة بجناحات مع إنى كنت مع ثورة يناير بس لما شفت الإخوان فى الحكم كنت أول الناس اللى هاجتمهم وماخفتش من حاجة، لأنهم كانوا فشلة وكذابين ومنافقين، ومصر كانت مش مهم عندهم خالص، المهم عندهم أنهم وصلوا للحكم عشان يقتلوا ويسرقوا باسم الدين. 

 

تستكمل سما: "اخترت اسم "فلول" بعد ما كنت هختار "30 يونيه" بس عشان محدش يقول إن ثورة "30 يونيه" بتاعة الرقاصين".

 

وأوضحت "أنا صاحبة هذه القناة أنا وفريق عملى ومفيش رجل أعمال بيدينى مليم عشان القناة "فلول" ديه بتعبر عنى وأنا بمولها لأنها بتعرض اللى عايزة أقوله بمزاجى من غير ما حد يقولى ما ينفعش". 

 

وعن علاقتها بالسياسة تقول "سما": أنا من حقى أعترض على أى حاجة، ومش ههاجم الإخوان بس، أنا كمان هعمل أغنية هنتقد فيها حكومة الببلاوى، أنا ما كنش ليا فى السياسة بس الفضل للإخوان".

 

وعن طبيعة البرامج التى ستقدمها، قالت إنها ستكون برامج ساخرة تتنقد عددا من الشخصيات مع أغنية ساخرة عن كل شخصية فى كل حلقة يتم تقديمها ومن بين هذه البرامج " الجيبة ضيقة" و"بانوا".